ایک سائل نے ایسا عذاب طلب کیا جو واقع ہونے والا ہے

  کافروں کے لئے جسے کوئی دفع کرنے والا نہیں

  (وہ) اللہ کی جانب سے (واقع ہوگا) جو آسمانی زینوں (اور بلند مراتب درجات) کا مالک ہے

  اس (کے عرش) کی طرف فرشتے اور روح الامین عروج کرتے ہیں ایک دن میں، جس کا اندازہ (دنیوی حساب سے) پچاس ہزار برس کا ہے٭

  سو (اے حبیب!) آپ (کافروں کی باتوں پر) ہر شکوہ سے پاک صبر فرمائیں

  بے شک وہ (تو) اس (دن) کو دور سمجھ رہے ہیں

  اور ہم اسے قریب ہی دیکھتے ہیں

  جس دن آسمان پگھلے ہوئے تانبے کی طرح ہو جائے گا

  اور پہاڑ (دُھنکی ہوئی) رنگین اُون کی طرح ہو جائیں گے

  اور کوئی دوست کسی دوست کا پرساں نہ ہوگا

  (حالانکہ) وہ (ایک دوسرے کو) دکھائے جا رہے ہوں گے، مجرم آرزو کرے گا کہ کاش! اس دن کے عذاب (سے رہائی) کے بدلہ میں اپنے بیٹے دے دے

  اور اپنی بیوی اور اپنا بھائی (دے ڈالے)

  اور اپنا (تمام) خاندان جو اُسے پناہ دیتا تھا

  اور جتنے لوگ بھی زمین میں ہیں، سب کے سب (اپنی ذات کے لئے بدلہ کر دے)، پھر یہ (فدیہ) اُسے (اللہ کے عذاب سے) بچا لے

  ایسا ہرگز نہ ہوگا، بے شک وہ شعلہ زن آگ ہے

  سر اور تمام اَعضائے بدن کی کھال اتار دینے والی ہے

  وہ اُسے بلا رہی ہے جس نے (حق سے) پیٹھ پھیری اور رُوگردانی کی

  اور (اس نے) مال جمع کیا پھر (اسے تقسیم سے) روکے رکھا

  بے شک انسان بے صبر اور لالچی پیدا ہوا ہے

  جب اسے مصیبت (یا مالی نقصان) پہنچے تو گھبرا جاتا ہے

  اور جب اسے بھلائی (یا مالی فراخی) حاصل ہو تو بخل کرتا ہے

  مگر وہ نماز ادا کرنے والے

  جو اپنی نماز پر ہمیشگی قائم رکھنے والے ہیں

  اور وہ (ایثار کیش) لوگ جن کے اَموال میں حصہ مقرر ہے

  مانگنے والے اور نہ مانگنے والے محتاج کا

  اور وہ لوگ جو روزِ جزا کی تصدیق کرتے ہیں

  اور وہ لوگ جو اپنے رب کے عذاب سے ڈرنے والے ہیں

  اور وہ لوگ جو اپنی شرم گاہوں کی حفاظت کرتے ہیں

  اور وہ لوگ جو اپنی گواہیوں پر قائم رہتے ہیں

  یہی لوگ ہیں جو جنتوں میں معزّز و مکرّم ہوں گے